الوضع الليلي
مساعد منصتنا (ليك ولفريقك)
في ركن كل صفحة في لوحة التحكم فيه زرار مساعد منصتنا. اسأله بالعامية إزاي تعمل أي حاجة على المنصة، أو عن أرقام أكاديميتك، وهو يرد عليك على طول.
بيرد على إيه
- «إزاي أعمل كذا؟»: بيرد من الدليل ده بس، وتحت الرد بيحط لينك للجزء اللي اعتمد عليه، تفتحه وتتأكد بنفسك. لو الإجابة مش في الدليل، بيقولك إنه مش متأكد ويوجّهك للدعم، ومش بيخترع خطوات.
- أسئلة عن أكاديميتك: زي «مين الطلاب اللي محتاجين متابعة؟»، أو «كام طالب في كورس كذا؟»، أو «الإيرادات الشهر ده عاملة إزاي؟». بيجيب الأرقام من بيانات أكاديميتك الحقيقية وقت السؤال، ومش بيخمّن.
لما الرد يذكر طلاب، بيظهر تحته اسم كل طالب كلينك بيفتح ملفه.
بيقرا إيه
| البيانات | مين يقدر يسأل عنها |
|---|---|
| الدليل | أي حد في الفريق |
| الكورسات (حالتها، وسعرها، ودروسها، وعدد طلابها) | أي حد بيشوف الكورسات |
| الطلاب (بحث، وتفاصيل طالب، والمحتاجين متابعة) | أي حد بيشوف الطلاب |
| أرقام الأكاديمية العامة | أي حد بيشوف التحليلات |
| الإيرادات وصافي الأرباح، وفلوس كل طالب | أي حد بيشوف المدفوعات |
| التحويلات المستنية تأكيدك | اللي يقدر يأكّد التحويلات |
| إجابات المقالي المستنية مراجعة | اللي يقدر يصحح الامتحانات |
| استهلاك الباقة ورصيدك | أي حد في الفريق |
يعني المساعد عمره ما بيوري حد في الفريق أكتر من اللي دوره بيسمحله يشوفه في لوحة التحكم. مثلًا، المعلم مش هيعرف منه الإيرادات. الأدوار موجودة في فريق الأكاديمية والصلاحيات.
بتشوفه بيعمل إيه
وإنت مستني الرد، بيظهرلك خطوة بخطوة هو بيعمل إيه دلوقتي: «بيدوّر على الطالب»، «بيقرا ملف الطالب»، «بيشوف الكورسات»... وكل خطوة تخلص عليها علامة ✓.
الإجراءات بكارت تأكيد
في باقة المحترف وأعلى (وكل باقات السنتر)، TodiAI مش بس بيرد: لما تطلب منه، يجهّزلك الإجراء في كارت تحت رده، وإنت اللي تدوس «تأكيد» أو «إلغاء». مفيش حاجة بتتنفذ من غير ما تأكدها.
| الإجراء | زي الزرار ده في لوحة التحكم | مين يقدر يأكده |
|---|---|---|
| تسجيل إن طالب اتتابع | «تمت المتابعة» | أي حد بيشوف الطلاب |
| رسالة واتساب لولي أمر | «راسل ولي الأمر على واتساب» | اللي يقدر يدير واتساب |
| فتح كورس لطالب (أو مد وصوله) | «فتح كورس للطالب» في صفحة الطالب | اللي يقدر يدير الاشتراكات |
| اعتماد درجات المقالي اللي TodiAI اقترحها | «اعتمد كل اقتراحات الذكاء» في نتايج الامتحان | اللي يقدر يصحح الامتحانات |
- الكارت بيتنفذ باسمك وبصلاحياتك وقت ما تأكده، بنفس الخطوات اللي الزرار بيعملها، وبيتسجل في سجل الأكاديمية.
- مدرس السنتر بيقدر يأكد بس اللي على كورساته وطلابه. تسجيل المتابعة ورسايل أولياء الأمور لإدارة السنتر.
- الكارت ليه 30 دقيقة يتأكد فيهم. بعد كده بيقفل، واطلبه تاني عشان يتجهز ببيانات جديدة.
- فتح الكورس عمره ما بيقصّر وصول طالب: لو الطالب معاه الكورس لمدة أطول، TodiAI بيقولك إن مفيش حاجة هتتغير.
- الفلوس برّه الإجراءات خالص: مش بيأكد تحويلات، ولا بيرجّع دفعات، ولا بيغيّر أسعار. وكمان مش بيمسح ولا بيعدّل كورسات أو إعدادات. لو طلبت حاجة زي كده، بيقولك تعملها منين بالخطوات.
في باقتي البداية والنمو المساعد بيقرا بس: بيرد ويقولك تعمل الحاجة منين، ومش بيجهّز إجراءات.
أسماء طلابك مش بتخرج برّه منصتنا
TodiAI بيكتب الإجابات بخدمة ذكاء اصطناعي خارجية (التفاصيل في سياسة الخصوصية). عشان كده، أسماء طلابك وأرقامهم مش بتتبعت لها خالص:
- الخدمة بتشوف كل طالب كرمز، زي «طالب 1».
- منصتنا هي اللي بتحط الاسم الحقيقي مكان الرمز قبل ما الرد يظهرلك.
- ده نفس اللي بيحصل في ملخصات متابعة الطلاب.
الاستثناء الوحيد: لو كتبت إنت اسم طالب في سؤالك، السؤال بيتبعت زي ما كتبته.
ذاكرتك
TodiAI بيفتكر عنك الحاجات اللي تساعده يرد عليك أحسن: بتدرّس إيه، الأرقام اللي بتهمك، والطريقة اللي بتحب الرد بيها. بيكتبها بعد ما المحادثة تهدى، أو في خلال دقيقة لو قلتله «افتكر إن...».
- إنت بس اللي بتشوف ذاكرتك، من زرار «ذاكرتي» فوق الشات، وتقدر تمسح أي سطر أو تمسحها كلها.
- أقصى حاجة 500 سطر، ومش بيحفظ فيها أي حاجة عن طلاب بعينهم.
المحادثة
- محادثتك بتتحفظ، فتقدر تقفل الشات أو تنقل بين الصفحات وترجعلها.
- محادثاتك القديمة كلها في زرار «المحادثات» فوق الشات، الأحدث فوق. افتح أي واحدة واسأل، والسؤال بيكمّل على نفس المحادثة.
- «محادثة جديدة» بيبدأ من الأول. افتح محادثة جديدة لما تغيّر الموضوع، عشان الإجابات تبقى أدق.
- كل واحد في الفريق ليه محادثاته هو.
التكلفة والحدود
- كل سؤال بيستهلك من نقاط الذكاء الاصطناعي اللي في باقتك، على قد تكلفته فعلًا.
- في باقتي البداية والنمو المساعد بيشتغل بموديل TodiAI الأساسي: السؤال حوالي 4,000 لـ 10,000 نقطة. ومن المحترف وأعلى (وكل باقات السنتر) بيشتغل بالموديل الأقوى: السؤال حوالي 50 لـ 160 ألف نقطة، على حسب البيانات اللي بيجيبها.
- لو النقاط خلصت، المساعد بيقف لحد أول الشهر الجاي أو لحد ما تكبّر باقتك.
- حد أقصى 12 سؤال في الدقيقة.
WARNING
الذكاء الاصطناعي ممكن يغلط في الصياغة. لو هتاخد قرار على رقم مهم، افتح الصفحة بتاعته في لوحة التحكم واتأكد منه.