الدومين الخاص

كل أكاديمية بتاخد عنوان على منصتنا زي academy.manasatna.com من أول يوم. ولو عندك دومين خاص (زي ahmed-physics.com)، تقدر تربطه بأكاديميتك.

ربط دومين خاص

من الإعدادات ← النطاقات اضغط «ربط دومين مخصص جديد»، واختار طريقة من الاتنين:

الطريقة الأولى: النيم سيرفرز (موصى بها)

خطوة واحدة عند شركة الدومين، وأكاديميتك بتفتح على www.دومينك، والدومين نفسه من غير www بيحوّل لها لوحده (بنفس الصفحة اللي الطالب كان طالبها).

1. اختار «نيم سيرفرز» واكتب الدومين من غير www (زي ahmed-physics.com).
2. إحنا بنجهّز الـ DNS بتاع الدومين عندنا، وبننقل السجلات اللي عليه دلوقتي (زي الإيميل). افتح «سجلات DNS» وراجعها. سجلات المنصة (@ وwww وسجل إثبات الملكية) مقفولة؛ والباقي تقدر تعدّله أو تضيف عليه بعد ما الدومين يتأكد (الخطوة 4).
3. في نفس الشاشة هتلاقي اتنين نيم سيرفرز خاصين بدومينك (شكلهم زي xxxxxxxx.ns1.manasatna.com وxxxxxxxx.ns2.manasatna.com). عند الشركة اللي اشتريت منها الدومين (GoDaddy، Namecheap وغيرهم) امسح النيم سيرفرز الموجودة وحطهم مكانهم بالظبط. هما خاصين بدومينك لوحده، وهما اللي بيثبتوا إنه بتاعك.
4. اضغط «فحص والتحقق». أول ما التغيير يوصل، شهادة الأمان (SSL) بتتعمل لوحدها للدومين ولـ www.

في جدول السجلات هتلاقي سجل الدومين نفسه (@) من نوع REDIRECT: هو اللي بيحوّل دومينك لـ www.دومينك.

قبل ما تغيّر النيم سيرفرز

• الإيميل: لو عندك بريد على الدومين، اتأكد إن سجلات MX (والـ TXT بتاعة SPF وDKIM) موجودة في جدول السجلات، وإلا الإيميل هيقف.
• DNSSEC: لو مفعّل عند شركة الدومين، اقفله الأول، وإلا الدومين هيبطل يفتح.
• لو الدومين كان على Cloudflare بالبروكسي (السحابة البرتقالي)، قيم سجلات A المنقولة بتكون عناوين Cloudflare مش السيرفر الحقيقي؛ هتلاقيها متعلّم عليها في الجدول، صحّحها.

لو حذفت الدومين من المنصة، الـ DNS اللي عندنا بيتمسح بكل سجلاته؛ رجّع النيم سيرفرز عند شركة الدومين للي كانت قبل كده الأول. ولو الدومين لسه موجّه لنيم سيرفرز عندنا من ربط قديم، مش هينفع يتضاف تاني بطريقة النيم سيرفرز قبل ما توجّهه لأي مزوّد تاني ويوصل التغيير؛ بعدها ضيفه وهتاخد نيم سيرفرز جديدة.

الطريقة التانية: CNAME

لو عايز تفضل ماسك الـ DNS بنفسك.

1. اختار «CNAME» واكتب الدومين. الأسهل والأضمن إنك تكتبه بـ www (زي www.ahmed-physics.com).
2. في لوحة تحكم مزوّد الـ DNS (GoDaddy، Namecheap، Cloudflare وغيرهم) ضيف السجلين اللي الشاشة بتوريهم بالظبط:
   • سجل TXT بيثبت إن الدومين بتاعك. مطلوب دايمًا، ومن غيره الدومين مش هيتفعّل.
   • سجل CNAME للاسم www (أو أي دومين فرعي) يوجّه لـ cname.manasatna.com. وفيه زرار «دليل توجيه الـ DNS» بيشرحها.
3. اضغط «تحديث الحالة». أول ما السجلات توصل، شهادة الأمان (SSL) بتتعمل لوحدها، والحالة بتبقى «نشط ومتصل بالكامل».

الدومين من غير www

الدومين الجذري نفسه (ahmed-physics.com من غير www) مش بيقبل سجل CNAME عند أغلب الشركات. عندك حلّين:

• اربط www.ahmed-physics.com، واعمل من عند شركة الدومين تحويل (Forwarding) من الجذري لـ www — أغلب الشركات بتوفره ببلاش.
• أو استخدم طريقة النيم سيرفرز فوق، والجذري هيشتغل لوحده.

TIP

توجيه الـ DNS ممكن ياخد من دقايق لحد 48 ساعة حسب شركة الدومين. المنصة بتعيد الفحص لوحدها كل عشر دقايق، فمش لازم تفضل فاتح الصفحة.

الدومين مربوط بأكاديمية تانية؟

لو ضفت الدومين ولقيت رسالة إنه مربوط بالفعل على منصتنا، يبقى هو (أو دومين مرتبط بيه زي نسخته بـ www) متسجّل في أكاديمية تانية. مفيش حاجة بتتفك لوحدها ولا بمرور الوقت:

1. اضغط «اطلب نقل الدومين» في نفس الرسالة.
2. ارفع إثبات إن الدومين بتاعك: صورة من حسابك عند الشركة اللي اشتريت منها الدومين يبان فيها اسمه، أو فاتورة الشراء أو التجديد (صور أو PDF)، واكتب ملاحظة لو حابب.
3. إدارة المنصة بتراجع الطلب وتبلغك بالرد في الإشعارات وبرسالة. لو وافقنا، الدومين بيتشال من الأكاديمية التانية وبيتضاف لأكاديميتك، وتكمّل الربط والتحقق عادي (سجل TXT، أو النيم سيرفرز الخاصة بيه).

حالة طلبك بتظهر في صفحة الدومينات، وتقدر تلغيه طول ما هو لسه بيتراجع.

تغيير عنوان أكاديميتك على منصتنا

عايز تغيّر academy.manasatna.com لاسم تاني؟ من الإعدادات ← النطاقات اضغط «اطلب تغيير العنوان»:

1. اكتب العنوان الجديد (حروف إنجليزي صغيرة وأرقام وشَرطة، زي ما بتختاره في التسجيل). الصفحة بتقولك وانت بتكتب لو هو متاح ولا لأ.
2. اكتب سبب التغيير وابعت الطلب. عندك طلب واحد مفتوح بس في نفس الوقت، وتقدر تلغيه طول ما هو لسه بيتراجع.
3. إدارة المنصة بتراجع الطلب وتبلغك بالرد في الإشعارات وبرسالة.

لو وافقنا، أكاديميتك بتشتغل على العنوان الجديد على طول، والعنوان القديم بيفضل يحوّل للجديد لمدة 90 يوم، فالروابط اللي مع طلابك بتفضل شغالة، ومحدش غيرك يقدر ياخده في الفترة دي. بعدها العنوان القديم بيتفك. ابدأ استخدم العنوان الجديد في كل حاجة بتنشرها.

دومين هدية

في بعض العروض، دفع باقتك بيديك دومين هدية لمدة سنة. لو أنت مستحقه، هتلاقي تبويب «الهدايا» في صفحة الاشتراك، وتختار منه اسم الدومين.