الوضع الليلي
الباقات والحدود
اشتراكك في منصتنا باقة شهرية (أو سنوية). كل باقة فيها حد للطلاب النشطين وأعضاء الفريق، وحصة شهرية من الحاجات اللي ليها تكلفة فعلية زي دقائق المشاهدة وتخزين الفيديو والرسايل، ومميزات بتزيد مع الباقة. أما الكورسات فمن غير حد في كل الباقات.
كل ده في صفحة الفواتير والاشتراك في لوحة التحكم. وأسعار الباقات الحالية موجودة على صفحة الأسعار وفي نفس الصفحة دي.
كل باقة فيها إيه
| الحصة الشهرية | بتتصرف في إيه |
|---|---|
| دقائق المشاهدة | الدقائق اللي طلابك اتفرجوها على فيديوهاتك |
| مساحة الفيديو (جيجا) | الفيديوهات اللي رفعتها ومتخزنة |
| رسايل SMS | أكواد الدخول والتسجيل لطلابك |
| رسايل واتساب | إشعارات أولياء الأمور وردودك عليهم |
| نقاط الذكاء الاصطناعي (TodiAI) | المساعد الذكي للطلاب، وملخصات متابعة الطلاب، والتصحيح الذكي لأسئلة المقال، ومساعد منصتنا في لوحة التحكم |
نقاط الذكاء الاصطناعي بتتخصم على قد تكلفة كل طلب فعلًا: رسالة طالب عادية من 1,000 لـ 6,000 نقطة تقريبًا، وتصحيح إجابة مقالية زيها، وملخص متابعة طالب حوالي 3,000 لـ 4,000 نقطة. يعني باقة البداية لوحدها تكفي آلاف الرسايل في الشهر. في باقتي البداية والنمو مساعد لوحة التحكم بيشتغل بموديل TodiAI الأساسي، ومن المحترف وأعلى (وكل باقات السنتر) بيشتغل بالموديل الأقوى.
في نفس الصفحة بتشوف استهلاكك الشهر ده من كل حصة، والحصص بتبدأ من جديد أول كل شهر.
دقائق المشاهدة بتتحسب إزاي: كل دقيقة طالب اتفرجها على أي فيديو بتتحسب دقيقة، أيًا كانت جودة الفيديو. والدقائق بتتحدّث كل ساعة. ولو حجم الفيديو اللي اتحمّل من مكتبتك أكبر من اللي اتشاف (زي حد بيحمّل الفيديوهات بأداة)، بيتحسب بالحجم: كل 45 ميجا = دقيقة. المشاهدة العادية لحد جودة 1080p عمرها ما توصل للرقم ده، فمش هتتحاسب على أكتر من اللي طلابك شافوه.
حد الطلاب وأعضاء الفريق
- الطلاب النشطين: كل باقة ليها عدد طلاب نشطين (الموقوفين والمحذوفين مش بيتحسبوا). لما توصل للحد، الطالب الجديد مش هيقدر يسجّل ولا تقدر تضيفه، والاستيراد من شيت بيضيف اللي يكفّي بس ويقولك الباقي اتساب ليه. بيوصلك تنبيه عند 80% و90% ولما الحد يكمل. تقدر ترقّي الباقة، أو توقف طلاب مش متابعين عشان تفضّي أماكن.
- أعضاء الفريق: عدد المساعدين اللي تقدر تضيفهم غير صاحب الأكاديمية، والدعوات اللي لسه ما اتقبلتش بتتحسب.
المميزات حسب الباقة
بعض المميزات بتبدأ من باقة معينة: الدومين الخاص والشهادات والكوبونات والواجبات والمتجر وملفات PDF المحمية من النمو، وتحليلات المشاهدة لكل طالب وأسئلة الدروس وخريطة «أنا متعثر» ومساعد TodiAI الأقوى وبوت تيليجرام وساحة التحدي والقوالب المخصصة من المحترف، وإزالة شعار منصتنا وأكواد التتبع (Google Analytics وTag Manager وMeta Pixel وTikTok Pixel وMicrosoft Clarity) والدعم المميز في الأعمال. كل باقات السنتر فيها كل المميزات. الجدول الكامل في صفحة الأسعار.
لو ميزة مش في باقتك، الصفحة بتاعتها بتقولك كده ومعاها زرار «رقّي باقتك». ولو نزلت لباقة أصغر، اللي عملته بيفضل محفوظ (الكوبونات والمنتجات والواجبات وأسئلة الدروس اللي موجودة)، وبيرجع يشتغل أول ما ترقّي.
باقات السنتر
السنتر ليه باقات خاصة بيه، وكل باقة فيها عدد المدرسين اللي السنتر يقدر يضيفهم، غير الحصص الشهرية اللي فوق. السنتر من غير باقة سنتر شغالة ما يقدرش يضيف مدرسين. ولو كل أماكن المدرسين اتملت (شامل الدعوات اللي لسه ما اتقبلتش)، رقّي الباقة أو الغي دعوة. الأسعار في تبويب «سنتر» على صفحة الأسعار.
لما حصة تخلص: الرصيد
لو استهلاكك عدّى حصة الباقة، الزيادة بتتدفع من رصيدك في منصتنا بسعر الوحدة. ده بيشتغل على دقائق المشاهدة (بالدقيقة)، ومساحة الفيديو، ورسايل SMS، ورسايل واتساب.
- تشحن رصيدك من نفس الصفحة: اكتب المبلغ بالجنيه وادفع على XPay.
- لو الرصيد مش كفاية، الخدمة اللي خلصت بس هي اللي بتقف، والباقي شغال. مثلًا: «مشاهدة الفيديوهات متوقفة لحد ما تشحن الرصيد أو ترقّي الباقة».
- الاستهلاك عمره ما بيخلّيك مديون: المنصة مش بتسحب أكتر من رصيدك عشان الاستهلاك.
لو عليك مديونية لمنصتنا
الرصيد بيبقى بالسالب لو فريق منصتنا سجّل عليك مبلغ (باتفاق معاك، زي اشتراك اتفقتوا تدفعه بعدين)، أو لو شحنة رصيد اترجعت.
- موقع الأكاديمية بيقفل عند طلابك فورًا لحد ما تسدّد، وبيشوفوا رسالة إن المنصة متوقفة. لوحة التحكم بتفضل مفتوحة ليك للقراءة، وتقدر منها تشحن الرصيد وتكلّم الدعم.
- بيوصلك SMS وإيميل وإشعار بالمبلغ أول ما المديونية تبدأ، وبعدها كل 3 أيام لحد ما تتسدّد. وفي أعلى كل صفحات لوحة التحكم شريط فيه المبلغ.
- تسدّد بالشحن: اشحن رصيدك بالمبلغ (صفحة الفوترة بتقترحه عليك). الشحن بيسدّد المديونية الأول، وأول ما الرصيد يرجع صفر أو أكتر الموقع بيرجع يشتغل لوحده.
- محتاج وقت؟ من الشريط اضغط «شغّل المنصة يومين»: الموقع يرجع لطلابك 48 ساعة. ده بيتعمل مرة واحدة بس لكل مديونية. ولو شايف إن فيه مشكلة في المبلغ، كلّمنا من الدعم الفني.
نقاط الذكاء الاصطناعي مش بتتدفع من الرصيد
لو نقاط الشهر خلصت، المساعد الذكي للطلاب، وملخصات المتابعة، والتصحيح الذكي (إجابات المقال بتيجي لك تصححها بنفسك)، ومساعد منصتنا بيقفوا لحد أول الشهر الجاي، أو لحد ما ترقّي باقتك. بيوصلك تنبيه عند 80% و90%، وتنبيه «خلصت» (ومعاه SMS) أول ما الطلبات تبدأ تترفض.
تغيّر باقتك
من «اختر الباقة المناسبة لنمو منصتك» اختار الباقة الجديدة (شهري أو سنوي) وادفع على XPay.
- الأيام الفاضلة من باقتك الحالية بتتحسب بقيمتها على الباقة الجديدة، فمش بتخسر حاجة.
- الاشتراك السنوي ليه سعر مخفّض، مكتوب جنب كل باقة.
- ممكن تلاقي «باقة خاصة ليك». دي باقة منصتنا عارضاها لأكاديميتك انت بالذات.
الفواتير
كل دفعة بتتأكد (اشتراك أو شحن رصيد) بتطلعلها فاتورة PDF، تقدر تحمّلها في أي وقت من جدول الفواتير.
الهدايا
لما منصتنا تعمل عرض (زي دومين هدية لأكاديميتك)، بيظهر في قسم الهدايا في نفس الصفحة. في عرض الدومين، بتختار الاسم والامتداد، وإحنا بنسجّله ونربطه بأكاديميتك. الربط بياخد من ساعة لـ 12 ساعة، ويوصلك إشعار أول ما يشتغل. شروط كل عرض مكتوبة جنبه. التفاصيل في دومين هدية.