فريق الأكاديمية والصلاحيات

لو حد بيساعدك (مدرس تاني، أو سكرتارية، أو حد بيرد على الطلاب)، ادعيه للوحة التحكم بصلاحيات على قد شغله، من غير ما تديله حسابك.

تدعي حد للفريق

1. من الطلاب والفريق ← فريق الأكاديمية اضغط «دعوة عضو جديد».
2. اكتب الإيميل بتاعه، واختار الصلاحية (الدور).
3. اضغط «إرسال الدعوة»، فيوصله إيميل فيه رابط الدعوة.

• الدعوة صالحة 7 أيام. لو خلصت، اضغط «إعادة إرسال الدعوة» فيوصله رابط جديد.
• لازم يقبل الدعوة بحساب على نفس الإيميل اللي بعتّلُه عليه.
• تقدر تلغي الدعوة قبل ما يقبلها.

في نفس الصفحة بتشوف أعضاء الفريق والدعوات المرسلة وحالة كل دعوة (بانتظار القبول، تم القبول، منتهية الصلاحية، ملغاة).

الأدوار

الأدوار اللي تقدر تدعي بيها حد بتختلف حسب نوع الأكاديمية. الصلاحيات بتتراجع على السيرفر مع كل طلب.

أكاديمية مدرس واحد:

الدور	يقدر يعمل إيه
صاحب الأكاديمية (إنت)	كل حاجة. هو بس اللي يقدر يدير باقة الأكاديمية ورصيدها، ويعدّل صلاحيات الأدوار
أدمن	كل حاجة تقريبًا: الإعدادات والهوية، والفريق، والكورسات، والطلاب، والامتحانات، والفلوس (تأكيد التحويلات والكروت والأرصدة، والاسترداد، والكوبونات)، والمتجر، والدعم، وسجل العمليات. ماعدا الباقة والرصيد
مساعد	الطلاب: يضيفهم، ويعدّل بياناتهم، ويفتحلهم كورسات، ويسجّل الحضور، ويصحّح الامتحانات والواجبات، ويرد على تذاكر الدعم. بيشوف الكورسات والدروس بس، وما يقدرش يعدّل المحتوى ولا يقرب من الفلوس أو الإعدادات

سنتر:

الدور	يقدر يعمل إيه
صاحب السنتر (إنت)	كل حاجة، زي صاحب الأكاديمية فوق
مدير	زي الأدمن فوق: كل حاجة ماعدا الباقة والرصيد
مدرس	المحتوى بتاعه: يعمل كورسات ويعدّلها وينشرها (من غير حذف)، والدروس والفيديوهات، والامتحانات والواجبات وتصحيحها، والحضور، والشهادات. بيشتغل في كورساته هو بس، وبيشوف الطلاب المشتركين فيها بس، وما يقدرش يضيف طلاب أو يعدّلهم، ولا يقرب من الفلوس أو المتجر أو صفحات الموقع
فريق دعم	الطلاب: يضيفهم، ويعدّل بياناتهم، ويفتحلهم كورسات، ويسجّل الحضور، ويرد على تذاكر الدعم ويديرها، والمتجر. ويأكّد أو يرفض التحويلات اليدوية اللي مستنية — وتأكيدها بيفتح الكورس للطالب، فاديها لحد تثق فيه — من غير ما يشوف تقارير المدفوعات. ما يقدرش يعدّل المحتوى

الجدول الكامل بكل صلاحية ومين عنده إيه موجود في الطلاب والفريق ← إدارة الأدوار.

تعدّل صلاحيات دور

صاحب الأكاديمية بس يقدر يغيّر اللي كل دور يقدر يعمله: من إدارة الأدوار اضغط تعديل جنب الدور، وعلّم على الصلاحيات اللي تديها له، واحفظ. التعديل بيتطبق على كل اللي عندهم الدور ده. تقدر تديه أي صلاحية لحد صلاحيات الأدمن، وما ينفعش أكتر منها (الباقة والرصيد ليك إنت بس). ولو عايز ترجّعه زي ما كان، اضغط «رجّع للأصل».

تغيّر دور حد أو تشيله

من قائمة أعضاء الفريق تقدر تغيّر دور أي عضو، أو تشيله من الفريق، فيقف وصوله للوحة التحكم. دور مالك الأكاديمية مش بيتغير من هنا.