واتساب والمتابعة الآلية

اربط واتساب أكاديميتك، فيوصل لأولياء الأمور رسايل لوحدها بدرجات الامتحانات والواجبات والغياب. وكمان بترد على رسايلهم من لوحة التحكم.

الصفحة في المتابعة الآلية في القايمة الجانبية (وليها سطر كمان في صفحة الإعدادات)، وفيها 3 تبويبات: المحادثات، والربط والإعدادات، وسجل الإشعارات.

تربط واتساب

1. افتح تبويب الربط والإعدادات، هيظهرلك رمز QR.
2. على موبايلك افتح واتساب، وروح الإعدادات ← الأجهزة المرتبطة (أو القائمة ⋮ على أندرويد)، واضغط ربط جهاز.
3. وجّه الكاميرا للرمز. الرمز بيتجدد لوحده كل كام ثانية، فسيب الصفحة مفتوحة لحد ما تتصل.
4. أول ما الحالة تبقى متصل، جرّب رسالة تجريبية لرقمك عشان تتأكد إن كل حاجة شغالة.

استخدم رقم مخصص للأكاديمية

الربط بالطريقة دي مش رسمي من واتساب، والرقم ممكن يتحظر لو اتبعت منه رسايل كتير. استخدمه لأولياء أمور طلابك بس، والأفضل يكون رقم مخصص للأكاديمية مش رقمك الشخصي.

لو فصلت واتساب من موبايلك، الحالة بتبقى غير متصل. المحادثات القديمة بتفضل محفوظة، لكن الإشعارات والرد بيقفوا لحد ما تربط تاني.

إشعارات أولياء الأمور

اختار الأحداث اللي تتبعت عنها رسالة لولي الأمر لوحدها:

الإشعار	بيتبعت إمتى
نتائج الامتحانات	أول ما الطالب يسلّم الامتحان، بدرجته وإذا كان ناجح ولا راسب
تصحيح الواجبات	لما تصحح الواجب، بالدرجة وملاحظتك. لو غيّرت الدرجة بعدين، بتتبعت رسالة بالدرجة الجديدة
شهادات الإتمام	لما الطالب ياخد شهادة إتمام كورس، برابط التحقق منها. مرة واحدة لكل شهادة
الغياب عن الحصص	بعد 10 دقايق من تسجيل الغياب، والرسالة بتتلغي لو صلّحت الغياب قبلها. التفاصيل في الحضور والمواعيد
بداية الحصص الأونلاين	أول ما الحصة الأونلاين تبدأ: إن الطالب يدخل من موقع الأكاديمية، من غير لينك الحصة. التفاصيل في الحضور والمواعيد

• الرسالة بتروح لرقم ولي الأمر المتسجّل في بيانات الطالب، مش لرقم الطالب. الطالب اللي ملوش رقم ولي أمر مش بيتبعتله حاجة. تقدر تضيف الرقم من ملف الطالب.
• الإعدادات بتتحفظ حتى لو واتساب لسه ما اتربطش، بس مفيش رسايل بتتبعت قبل الربط.

المحادثات

أي رسالة بتيجي على رقم الأكاديمية من ولي أمر أو طالب بتظهر في تبويب المحادثات، ومعاها الإشعارات اللي اتبعتتله.

• المنصة بتعرف الطالب من الرقم لوحدها. والرقم اللي مش متسجّل لأي طالب بيظهر «غير مرتبط بطالب».
• تقدر تدوّر برقم أو اسم طالب، وترد من نفس الصفحة: Enter للإرسال، وShift+Enter لسطر جديد.

سجل الإشعارات وحدود الباقة

تبويب سجل الإشعارات فيه آخر الرسايل: الطالب، والمستلم، والنوع، والحالة (في الانتظار، أو تم الإرسال، أو فشل).

كل رسالة بتبعتها (إشعار أو رد منك) بتتحسب من رسايل واتساب اللي في باقتك. الرسايل اللي بتجيلك مش بتتحسب.

• لو رسايل الباقة خلصت، الرسايل الزيادة بتتدفع من رصيدك.
• لو الرصيد كمان مش كفاية، الرسالة مش بتتبعت، وبتظهر في السجل إنها فشلت. اشحن رصيدك أو كبّر باقتك عشان الرسايل ترجع تتبعت. شوف الباقات والحدود.
• الرسالة اللي فشلت ومتبعتتش، تمنها بيرجعلك.
• فيه كمان حد يومي لكل أكاديمية: 250 رسالة في أي 24 ساعة (عشان رقمك ما يتحظرش من واتساب)، حتى لو باقتك فيها رسايل أكتر. الرسايل اللي فوقه بتظهر في السجل إنها فشلت بسبب الحد اليومي، والعداد بيفضى لوحده مع الوقت.
• في السجل تقدر تعلّم على «اللي فشلت بس» عشان تشوف الرسايل اللي محتاجة منك حاجة، وتقلّب في الصفحات للرسايل الأقدم.

تنبيهات ليك على تليجرام

لو عايز توصلك إنت تنبيهات فورية على تليجرام، من الإعدادات ← تليجرام:

1. على تليجرام افتح @BotFather وابعت /newbot، واختار اسم ويوزر للبوت، وانسخ الرمز (Token) اللي هيبعتهولك. استخدم بوت مخصص للأكاديمية بس.
2. الصق الرمز واضغط «ربط البوت».
3. افتح البوت واضغط Start، وارجع للصفحة واضغط «تم، اربط».
4. اختار التنبيهات اللي عايزها:
   • تحويل مستني تأكيدك.
   • تذكرة دعم أو رسالة «تواصل معايا».
   • طلب جديد في المتجر.

«فك الربط» بيوقف التنبيهات، وبيمسح رمز البوت من المنصة.