الوضع الليلي
جولة في لوحة التحكم
لوحة التحكم هي المكان اللي بتدير منه كل حاجة في أكاديميتك. بتدخل عليها من app.manasatna.com.
الصفحة الرئيسية
- «خلّي أكاديميتك جاهزة 100%»: خطوات البداية (رفع الشعار، أول كورس، نشره، أول طالب). كل خطوة بتتعلّم لوحدها لما تخلصها.
- خطة الاشتراك: باقتك الحالية، وتاريخ التجديد، واستهلاكك الشهر ده من الفيديو والمشاهدة والرسائل والذكاء الاصطناعي. لو قربت تخلص حد، هتلاقي تنبيه هنا وهيوصلك إيميل.
- أرقام سريعة: عدد الطلاب، والكورسات المنشورة، والإيرادات، ومشاهدات الدروس.
- «دورة جديدة» فوق: أسرع طريق لإنشاء كورس.
- «زيارة الموقع»: يفتحلك موقع أكاديميتك زي ما الطالب بيشوفه.
TodiAI في الصفحة الرئيسية
كارت TodiAI بيوريك نقاط الذكاء الاصطناعي اللي استهلكتها الشهر ده من باقتك، واللي TodiAI عمله لأكاديميتك: تدريبات الطلاب الأسبوع ده ومتوسط درجاتهم فيها، والفيديوهات اللي فهمها، والأسئلة اللي كتبها في البنك، والمقالي اللي مستني مراجعتك. ولو عايز تعرف النقاط راحت فين بالظبط، هتلاقيها مقسمة حسب الاستخدام في صفحة الذكاء الاصطناعي.
القايمة الجانبية
القايمة ثابتة على جنب الشاشة مهما نزلت في الصفحة، ومتقسمة أقسام:
| القسم | فيه إيه |
|---|---|
| (فوق) | لوحة التحكم |
| التدريس | الأكاديمي (الكورسات، والدروس، وصفحات الأكاديمية، والشهادات، والحضور والمواعيد)، والامتحانات والواجبات (ومعاها بنك الأسئلة)، والطلاب والفريق (الطلاب، ومتابعة الطلاب، والفريق والأدوار، وآراء الطلاب، والمجتمع) |
| الفلوس والمبيعات | المالية (الأرباح، والدفعات المعلقة، والكوبونات، والكروت، وأرصدة الطلاب، وخطط الاشتراك)، والمتجر (منتجاتك الملموسة وطلباتها وشحنها) |
| التواصل والنمو | المتابعة الآلية (واتساب ورسايل أولياء الأمور)، والتحليلات والأداء، والذكاء الاصطناعي |
| الأكاديمية | الدعم الفني، والفواتير والاشتراك، وإعدادات الأكاديمية |
- الدوّارة: اكتب جزء من اسم أي صفحة في خانة «دوّر على صفحة…» فوق القايمة، وEnter بيفتح أول نتيجة. تقدر توصل لها من أي مكان بـ Ctrl+K (أو ⌘K على الماك).
- تصغير القايمة: زرار «تصغير القائمة» تحت بيخليها أيقونات بس، عشان الصفحة تاخد مساحة أكبر. وبتفضل كده لحد ما تكبّرها تاني.
- حسابك: اسمك تحت في القايمة بيفتح «حسابي وطرق الدخول»، وجنبه زرار تسجيل الخروج.
جولة المنصة والجديد
أول مرة تدخل لوحة التحكم (إنت أو أي حد من فريقك)، بتبدأ جولة قصيرة بتعدّي على أهم أجزاء المنصة وبتشاور على مكانها في القايمة. الجولة بتوريك بس الحاجات اللي في باقتك واللي دورك يقدر يفتحها.
- «التالي» و«السابق» أو الأسهم في الكيبورد بيمشّوك فيها، والنقط تحت بتوريك إنت فين.
- «كمّل بعدين» (أو Esc) بيقفلها، وبترجعلك تاني يوم من نفس الخطوة.
- «تخطّي» بيقفلها خالص.
- على الموبايل الجولة بتبقى كروت تحت الشاشة بتقلّب بينها.
زرار الجولة (البوصلة) فوق زرار TodiAI تحت الشاشة بيفتح قايمة صغيرة:
- الجولة الكاملة: تعيد الجولة كلها في أي وقت.
- الجديد: لما نضيف ميزة جديدة، هتلاقي على الزرار رقم بعدد الميزات اللي لسه ما شفتهاش، وأول ما تدخل بتاخدك جولة قصيرة على الميزة دي بس. وتحتها هتلاقي آخر الميزات بالاسم لو حابب تتفرج على واحدة تاني.
اللي خلّصته أو تخطيته بيتحفظ على حسابك، فمش هيظهرلك تاني على أي جهاز.
أكتر من أكاديمية؟
لو عندك أكتر من أكاديمية، دوس على كارت الأكاديمية فوق القايمة (فيه اسمها ودورك فيها) واختار اللي عايز تشتغل عليها.