الشهادات

تقدر تدّي طلابك شهادة إتمام لأي كورس، وكل شهادة ليها كود تحقق يقدر أي حد يتأكد منه.

تصدر شهادة إزاي

1. من الأكاديمي ← الشهادات اضغط «إصدار شهادة إتمام».
2. اختار الدورة، وبعدين الطالب. لازم الطالب يكون مشترك في الكورس ده.
3. اضغط «إصدار الشهادة».

الطالب بيلاقي شهادته في صفحة «شهاداتي» في حسابه، ويقدر يطبعها أو يشاركها.

قالب الشهادة

من الأكاديمي ← الشهادات ← قالب الشهادة تكتب اللي بيطلع على شهادات أكاديميتك:

• عنوان الشهادة، زي «شهادة إتمام دورة».
• نص الشهادة: اكتب {student} مكان اسم الطالب و{course} مكان اسم الكورس (لازم الاتنين)، وممكن {academy} و{date}.
• اسم الموقّع ولقبه، زي «أ. محمد علي — مدرس الفيزياء».
• صورة التوقيع وصورة الختم (اختياري).

أي خانة تسيبها فاضية بيطلع مكانها الكلام الافتراضي.

لكل كورس قالب خاص: من «الإصدار التلقائي» اختار الكورس، وفي «قالب شهادة الكورس ده» غيّر اللي عايزه بس (مثلاً موقّع مختلف لمدرس الكورس). الخانات الفاضية بتاخد اللي في قالب الأكاديمية. في السنتر، كل مدرس بيغيّر قالب كورساته، وقالب الأكاديمية بيعدّله صاحبها.

TIP

الشهادة بتحفظ القالب زي ما كان يوم ما اتصدرت. لو عدّلت القالب بعد كده، الشهادات القديمة بتفضل زي ما هي، والجديدة بس هي اللي بتطلع بالتعديل.

الإصدار التلقائي

بدل ما تصدر كل شهادة بإيدك، خلّي الكورس يصدرها لوحده:

1. من الأكاديمي ← الشهادات، في جزء «الإصدار التلقائي»، اختار الكورس.
2. شغّل «اصدر الشهادة لوحدها لما الطالب يخلّص الكورس».
3. (اختياري) علّم على الامتحانات اللي لازم الطالب ينجح فيها الأول، واكتب أقل درجة للشهادة لو عايزها غير درجة نجاح كل امتحان.
4. اضغط «حفظ».

من ساعتها، أول ما الطالب يخلّص كل دروس الكورس (وينجح في الامتحانات اللي اخترتها، بأي ترتيب) بتطلع له الشهادة مرة واحدة، ويوصله إشعار، ولولي أمره رسالة واتساب برابط التحقق لو واتساب الأكاديمية مربوط.

• الطلاب اللي خلّصوا الكورس قبل ما تشغّله: اضغط «اصدر لكل اللي خلّصوا قبل كده»، والرقم جنبه بيقولك عددهم.
• الإصدار التلقائي بيستنى لحد ما اسم الموقّع يتكتب في قالب الأكاديمية أو قالب الكورس. لو اتكتب بعد ما في طلاب خلّصوا، اضغط «اصدر لكل اللي خلّصوا قبل كده».
• الطالب الموقوف أو المتشال مش بياخد شهادة.
• الشهادة اللي سحبتها مش بتطلع تاني لوحدها؛ لو عايز ترجعها اصدرها بنفسك.
• لو في حاجة هتمنع الشهادة إنها تطلع (زي امتحان مطلوب مش منشور، أو كورس مفيهوش دروس منشورة) بتلاقيها مكتوبة فوق الإعدادات.
• الإصدار التلقائي جزء من ميزة الشهادات في باقتك.

TIP

الطالب ليه شهادة واحدة لكل كورس. لو أصدرتها تاني لنفس الطالب ونفس الكورس، بيتحدّث تاريخها بس، ومش بتتعمل شهادة جديدة.

التحقق من الشهادة

كل شهادة عليها كود تحقق ورابط زي manasatna.com/verify/VER-…. أي حد (مدرسة، جامعة، ولي أمر) يفتح الرابط ويشوف إن الشهادة حقيقية، وصادرة لمين، ومن أنهي أكاديمية.